Рэспубліканскі дыстанцыйны конкурс ландшафтных праектаў "Дызайн саду"

Запрашаем прыняць удзел у рэспубліканскім дыстанцыйным конкурсе ландшафтных праектаў "Дызайн саду" (далей - конкурс).

Конкурс праводзіцца з мэтай прыцягнення навучэнцаў і педагогаў да вывучэння прыёмаў ландшафтнага праектавання малых садоў сродкамі дыстанцыйнага навучання.

Конкурс складаецца з 3 дыстанцыйных адукацыйных этапаў і прадугледжвае самастойнае вывучэнне прапанаваных тэм па ландшафтным дызайне. Пасля чаго выконваецца выніковая праца - ствараецца праект у адной з намінацый.

Намінацыі конкурсу і тэрміны падачы праектаў:

1. Намінацыя "Лабірынт" з 15 красавіка па 30 красавіка 2020 года.

Прадугледжвае стварэнне праекта лабірынта для саду са шматгадовых раслін або кустоў, камянёў і іншага прыроднага матэрыялу на ўчастку памерам 10 м х10 м.

2. Намінацыя "Партэр" з 2 мая па 15 мая 2020 года.

У гэтай намінацыі неабходна прадставіць праект партэрнай зоны з выкарыстаннем аднагадовых кветкава-дэкаратыўных раслін. Памер і форма рэгулярнага кветніка адвольны.

3. Намінацыя «Восень у садзе» з 15 траўня па 30 траўня 2020 года.

Дадзеная намінацыя прадугледжвае стварэнне міксбодзеры з аднагадовых і шматгадовых кветкава-дэкаратыўных раслін, дэкаратыўных кустоў. Галоўнай умовай распрацоўкі праекта з`яўляецца выкарыстанне раслін з максімальным эфектам дэкаратыўнасці і цвіцення ў перыяд з канца жніўня па пачатак кастрычніка.

Праект у намінацыі ўключае: план-схему з эксплікацыяй раслін, візуалізацыю кветніка (графіка можа быць камп'ютарная або ручная), назва праекта і аўтара. Вітаецца наяўнасць кароткага апісання асноўнай ідэі праекту.

Выкананыя праекты (у кожнай намінацыі) павінны быць адпраўлены не пазней за вызначаны тэрмін на адрас электроннай пошты: otd_flora@rcek.by з паметкай дыстанцыйны конкурс ландшафтных праектаў "Дызайн саду" з указаннем аўтара.

Рэгістрацыя ўдзельнікаў конкурсу будзе ажыццяўляцца па дасланых работах.

На кожным з дыстанцыйных этапаў будуць вызначацца 10 лепшых праектаў сада, якія адпавядаюць тэме намінацыі і сучасным патрабаванням ландшафтнага дызайну. Лепшыя праекты будуць размешчаны на сайце Рэспубліканскага цэнтра экалогіі і краязнаўства www.rcek.by.

Пераможцы будуць вызначацца ў кожнай намінацыі (I месца - адно II месца - два і III месца - два) у дзвюх катэгорыях: навучэнцы (12-16 гадоў) і педагогі.

Педагогі і навучэнцы, якія выканалі праекты ўсіх трох намінацый, атрымаюць сертыфікаты ўдзельніка рэспубліканскага дыстанцыйнага конкурсу ландшафтных праектаў "Дызайн саду", а пераможцы - дыпломы Рэспубліканскага цэнтра экалогіі і краязнаўства.