Рэспубліканскі семінар кіраўнікоў музеяў прайшоў у Магілёўскай вобласці
26–27 лістапада 2025 года на Магілёўшчыне адбыўся рэспубліканскі семінар кіраўнікоў музеяў «Эфектыўныя падыходы ў арганізацыі музейнай дзейнасці ва ўстановах адукацыі».
Арганізатарамі семінара выступілі Міністэрства адукацыі Рэспублікі Беларусь, Рэспубліканскі цэнтр экалогіі і краязнаўства, галоўнае ўпраўленне па адукацыі Магілёўскага аблвыканкама і Магілёўскі абласны цэнтр творчасці.
У мерапрыемстве прынялі ўдзел каля 60 чалавек — прадстаўнікі органаў дзяржаўнага кіравання, супрацоўнікі музеяў сістэмы Міністэрства культуры, каардынатары музейнай работы і кіраўнікі музеяў устаноў адукацыі з усіх рэгіёнаў Беларусі.
Семінар адкрыўся мітынгам і ўрачыстай цырымоніяй ускладання кветак да Мемарыяльнага комплекса «Буйніцкае поле». Пленарнае пасяджэнне семінара прайшло ў Музеі Славы Магілёўшчыны, дзе выступілі вядучыя спецыялісты сістэмы адукацыі і культуры ў галіне музейнай дзейнасці, а таксама кіраўнікі музеяў розных рэгіёнаў, якія пазнаёмілі з эфектыўным вопытам выкарыстання музейнага патэнцыялу ўстаноў адукацыі рэгіёна ў выхаванні дзяцей і моладзі.
У рамках праграмы ўдзельнікам рэспубліканскага семінара быў прадстаўлены станоўчы практычны вопыт дзейнасці музеяў: Магілёўскага абласнога кадэцкага вучылішча;
народнага гісторыка-краязнаўчага музея ДУА «Александрыйская сярэдняя школа Шклоўскага раёна»;
комплекснага музея ДУА «Старасельская сярэдняя школа Шклоўскага раёна»;
краязнаўчага музея ДУА «Гімназія г. Шклова»;
гісторыка-краязнаўчага музея ДУА «Чарнаруцкая сярэдняя школа Шклоўскага раёна»;
гістарычнага музея ДУА «Сярэдняя школа № 4 г. Шклова».
Вышэйпералічаныя ўстановы адукацыі прадэманстравалі сучасныя тэндэнцыі, а таксама традыцыйныя формы работы і дасягненні ў арганізацыі музейнай дзейнасці. Пры падвядзенні вынікаў удзельнікі рэспубліканскага семінара далі высокую адзнаку арганізатарам дадзенага мерапрыемства.
Акрамя таго, удзельнікам семінара была прапанавана культурна-адукацыйная праграма з наведваннем Музея Славы Магілёўшчыны, а таксама значных аб’ектаў Шклоўскага раёна.
Семінар стаў добрай пляцоўкай для абмену вопытам, удасканалення прафесійных кампетэнцый і стымулам для далейшага развіцця музейнай справы ва ўстановах адукацыі краіны.
