Вынікі другога (рэспубліканскага) этапа рэспубліканскага воднага конкурсу даследчых праектаў
28 мая 2020 года ва ўстанове адукацыі "Рэспубліканскі цэнтр экалогіі і краязнаўства" ў рэжыме анлайн адбыўся фінальны этап Рэспубліканскага воднага конкурсу даследчых праектаў.
Рэспубліканскі водны конкурс даследчых праектаў праводзіцца штогод з 2007 года і з'яўляецца нацыянальным этапам Міжнароднага конкурсу навукова-даследчых і прыкладных праектаў навучэнцаў па захаванні водных рэсурсаў "Стакгольмскі Юніёрскі Водны Прыз" (Stockholm Junior Water Prize - SJWP), які праходзіць World Water Week) у г. Стакгольме, Швецыя, пад патранажам кронпрынцэсы Швецыі Вікторыі і збірае навучэнцаў з больш за 30 краін свету, у тым ліку і Рэспублікі Беларусь.
Каардынацыю дзейнасці па арганізацыйным і метадычным забеспячэнні падрыхтоўцы і конкурсу ажыццяўляюць Рэспубліканскі цэнтр экалогіі і краязнаўства сумесна з унітарным прадпрыемствам "Кока-Кола Беврыджыз Беларусь".
Мэта правядзення конкурсу - развіццё навукова-даследчай і інавацыйнай дзейнасці вучняў у сферы аховы водных рэсурсаў.
У 2020 годзе ў конкурсе прынялі ўдзел 69 праектаў, аўтарамі якіх з'яўляюцца навучэнцы ўстаноў агульнай сярэдняй адукацыі і дадатковай адукацыі дзяцей і моладзі ва ўзросце 14-17 гадоў.
Па рашэнні аргкамітэта і журы, у які ўключаны кандыдаты навук, супрацоўнікі інстытута гідрабіялогіі Нацыянальнай акадэміі навук і Беларускага дзяржаўнага ўніверсітэта, для прадстаўлення на вочным (рэспубліканскім) этапе конкурсу было адабрана 12 праектаў.
Праекты былі прысвечаны вывучэнню біяразнастайнасці водных экасістэм, біяіндыкацыі прыродных, у тым ліку антрапагенна змененых, вадаёмаў, захаванню водных рэсурсаў, аптымізацыі выкарыстання вады ў побыце і на вытворчасці. Вялікая ўвага была ўдзелена вывучэнню забруджвання вадаёмаў, а таксама спосабам ачысткі вады. Асаблівую цікавасць ва ўдзельнікаў конкурсу выклікалі праекты, накіраваныя на ацэнку ўзроўню забруджвання вадаёмаў мікрапластыкам.
